Mitambong si Davao City Mayor Sebastian “Baste” Duterte sa grand opening sa 75,000-seater King Dome sa Davao City atol sa ika-41 nga founding anniversary sa Kingdom of Jesus Christ o KOJC.
Ang King Dome opisyal nga giablihan kagahapong adlawa human sa 14 ka tuig nga construction sukad sa groundbreaking niini niadtong 2012.
Nahimutang ang maong pasilidad sa KOJC compound duol sa Davao International Airport ug gitukod aron mahimong venue sa dagkong religious gatherings, concerts, sports events ug uban pang kalihukan.
Samtang, nagpaabot usab og pagtimbaya si Vice President Sara Duterte ngadto sa KOJC ug kang Pastor Apollo Quiboloy alang sa ika-41 nga anibersaryo sa grupo ug sa grand opening sa King Dome.
Sa iyang mensahe, nanghinaut si VP Sara nga padayon mahimong tinubdan sa paglaum ug pagtuo ang KOJC alang sa mga Pilipino.
Ang presensya ni Mayor Baste ug mensahe ni VP Sara nahimong kabahin sa selebrasyon sa KOJC, nga gitambongan sa liboan ka miyembro ug supporters.
Gilauman usab nga ang pagabli sa King Dome makadugang sa kapasidad sa Davao City sa pag-host og dagkong national ug international events sa umaabot.| VIA BOMBO EROS PAJOTA
