Muarangkada na sa ikaduhang round sa US Open si Filipina tennis star Alex Eala human niya gipildi si American qualifier Mary Stoiana, 6-1, 6-2, sayo karong Miyerkules, Setyembre 2, 2026.
Gidominar ni Eala ang unang set ug nakabreak og duha ka higayon, samtang mas hugot ang ikaduhang set human maabante si Stoiana sa unang tulo ka games. Nakatabla si Eala sa 2-2 ug nakabreak sa ikalimang game aron makuha pag-usab ang bentaha, sa wala pa niya tapuson ang duwa sa straight sets.
Nahimong usa sa ginapaabot nga first-round matches ang Eala-Stoiana tungod sa dakong interes sa mga fans, hinungdan nga gibutang kini sa 14,053-seater nga Louis Armstrong Stadium, ang ikaduhang pinakadakong show court sa USTA Billie Jean King National Tennis Center. Misaka usab og hapit $400 o kapin ₱25,000 ang resale price sa tickets human ipahibalo ang schedule.
Gisuportahan usab si Eala sa daghang Filipino fans sa New York, diin dako ang Filipino community.
Tugbang niini ang iyang usa ka US Open main draw win niaging tuig ug sunod niyang atubangon si Ukrainian Oleksandra Oliynykova, world No. 46, sa round of 64. Sa ilang miaging panagtagbo sa Strasbourg niadtong Mayo, midaog si Oliynykova batok kang Eala sa tulo ka sets, 3-6, 7-5, 6-3.
Kung makadaog si Eala, posibleng iyang atubangon sa third round ang iyang kanhing doubles partner nga si Iva Jovic, world No. 14, nga adunay 2-0 nga record batok kaniya.
