Nakabsan sa kinabuhi ang 2 ka Filipino seafarers human giatake ang Saudi Arabia-flagged tanker nga SIDR samtang naglawig sa Strait of Hormuz kaniadtong August 31, 2026.
Gikumpirma sa Bahri, national shipping company sa Saudi Arabia, nga naigo ang ilang barko atol sa pagbiyahe sa maong strategic waterway, apan wala kini naghatag og dugang detalye bahin sa insidente.
Sumala sa United Kingdom Maritime Trade Operations o UKMTO, naigo ang tanker sa tulo ka wala pa mailhing projectiles samtang nag-transit sa Strait of Hormuz.
Wala pa usab matino kung kinsa ang responsable sa pag-atake ug unsang matang sa projectiles ang miigo sa barko.
Kahinumdoman nga kaniadtong miaging bulan, naigo usab ang Wedyan supertanker sa Bahri samtang naglawig duol sa kadagatan sa Oman.
Adunay 2 pa ka laing barko sa kompanya, ang AMZAN ug MASA, ang kaniadto giatake usab sa Red Sea sa Houthi rebels gikan sa Yemen.
Samtang, nagpabiling sensitibo ang seguridad sa Strait of Hormuz tungod sa nagpadayong tensyon sa rehiyon ug sunod-sunod nga maritime incidents.
Una nang nagpahayag ang Iran og mga hulga batok sa pipila ka barkong moagi sa maong agianan, apan wala pa’y kumpirmasyon nga konektado kini sa pinakabag-ong pag-atake sa SIDR.
