DAVAO CITY – Gibahad ni Davao City Mayor Baste Duterte ang mga drayber nga daw walay pagpakabana ug respeto sa mga pedestrial lanes nga kasagarang giagian sa mga katawhan sa mga nag-unang kadalanan sa dakbayan.
Gumikan kana sa mga nadawat nga mga managlahing insidente mahitungod sa disgrasya sa pedestrial lanes karung simanaha.
Tungod niana, subling nagpahibalo si Davao City Transportation and Traffic Management Office head Dionisio Abude sa mga kaskaserong mga drayber nga magbaton ug disiplina sa dalan ilabi na sa pagsunod sa mga balaod-trapiko.
Matud pa sa opisyal, patas lamang ang tanan sa paggamit ug kalsada, magmaneho man o magbaklay busa kinahanglan gyud ang disiplina ug respeto sa matag-usa ilabi na sa paggamit ug kalsada.
Kahinumdumang nagpatawag si Mayor Baste sa mga sakop sa CTTMO, Highway Patrol Group ug Land Transportation Office aron pahingusgan ang ilang presensya sa mga nag-unang kadalanan sa syudad.
VIA || Bombo LJ Florendo
