Gisupak ni Davao City Councilor Danny Dayanghirang ang paggamit sa Diversion Road paingon sa Shrine Hills isip ruta sa mga ipahigayong marathon sa siyudad.
Matud ni Dayanghirang, delikado ang maong dalan alang sa mga runner tungod sa kagamay niini, pagkakurba ug pagpaubos sa karsada.
Gipunting niya nga paspas usab ang dagan sa mga sakyanan nga moagi sa maong bahin, nga mahimong makahatag og peligro sa mga partisipante sa marathon.
Dugang pa niya, mas motaas ang risgo tungod sa presensya sa mga dagkong truck ug sa isla sa tunga sa dalan nga mahimong hinungdan sa aksidente.
Tungod niini, iyang girekomenda nga mangita og mas luwas nga ruta alang sa mga marathon event.
Giuyonan usab sa City Council ug sa City Traffic and Transport Management Office o CTTMO ang maong rekomendasyon aron masiguro ang kaluwasan sa tanang modagan sa marathon. | VIA BOMBO EROS PAJOTA
