Hugot nga gilimod ni kanhi ACT Teachers Party-List Rep. France Castro ang alegasyon nga siya kuno midawat og mga maleta nga puno sa kuwarta gikan kang kanhi Cong. Zaldy Co.
Sumala kang Castro sa paghinabi sa Bombo Radyo, usa kini ka “orchestrated scheme sa mga Duterte supporters” nga tumong ilihis ang atensyon sa publiko gikan sa mga kasong giatubang ni kanhi Pangulong Rodrigo Duterte sa International Criminal Court (ICC) ug sa mga panawagan sa impeachment batok kang Vice President Sara Duterte.
Gibutyag ni Castro nga organisado lamang nga taktika nga nagkatag nga mga alegasyon, nga susama sa mga naunang harassment cases nga gisang-at batok kaniya.
Niadtong miaging tuig, miingon usab si Castro nga ang Duterte political dynasty ang anaa sa likod sa giingong contrived ethics complaints batok kaniya, isip paagi sa pagtabon sa giingong korapsyon ug pag-abuso sa confidential ug intelligence funds (CIF).
Dugang pa niya, klaro nga gigamit ang maong mga akusasyon aron dauton ang mga kritiko sa administrasyon ug pahuyangon ang Makabayan bloc.
Bisan paman niini, gibarugan ni Castro nga magpadayon siya sa pagpaningkamot alang sa transparency ug accountability sa gobyerno, ilabina sa paggamit sa pondo alang sa mga proyekto sa imprastruktura ug mga serbisyong pangkatilingban.
Sa pagkakaron, padayon nga init nga gihisgutan sa Kongreso ug sa publiko ang gitawag nga “maleta scandal,” diin pipila ka mga kanhing sundalo miingon nga nakasaksi sila sumala pa sa giingong paghatod og kickbacks gikan sa mga flood control projects.
Apan alang kang Castro, klaro nga kabahin kini sa mas halapad nga kampanya sa pagpangdaot batok sa mga progresibong magbabalaod.
