Lima ka tawo ang naluwas human sa landslide sa Guidag-Surong, Baguio City kagahapong gabii, Agosto 9, tungod sa padayon ug kusog nga pag-ulan.
Sumala sa Baguio City Public Information Office, nahitabo ang landslide pasado alas 7:00 sa gabii ug naigo niini ang tulo ka balay nga gipuy-an sa tulo ka pamilya.
Base sa impormasyon sa Baguio City Police Office, mokabat sa 12 ka tawo ang nagpuyo sa maong mga balay. Pito ang nagpuyo sa unang balay, duha sa ikaduha, ug tulo sa ikatulo.
Pagsapit alas 8:59 sa gabii, upat na ka tawo ang nakit-an ug naluwas, lakip ang duha ka babaye, usa niini bata, ug duha ka hamtong nga lalaki. Gidala dayon sila sa ospital aron matambalan.
Pag-abot alas 9:40 sa gabii, lima na ang kumpirmadong naluwas, samtang pito pa ang gipangita sa mga tigluwas.
Padayon ang pagpangita ug pagluwas sa mga otoridad, lakip ang City Disaster Risk Reduction and Management Office, mga bombero, kapulisan ug mga tigresponde sa barangay aron makit-an ang pito pa ka tawo nga gikatahong natabunan sa nangahugno nga yuta.
