DAVAO CITY – Hingpit na nga gibasura sa Office of the City Prosecutor (OCP) sa Island Garden City of Samal (Igacos) sa giduso nga libel case nga giduso batok sa Davao-based freelance reporter, Davao-based businesswoman, ug wala hinganli nga akusado.
Sa resolusyon nag gipagula ni City Prosecutor Joseph M. Apao, gi-dismiss niini ang reklamong libel nga giduso ni kanhi National Bureau of Investigation-South Eastern Mindanao Regional Office (NBI-Semro 11) Regional Director lawyer Arnold D. Rosales batok kang Editha Z. Caduaya, Amadea L. Aquino ug wala hinganli nga editor sa usa ka mantalaan.
Nag-ugat ang reklamo gumikan sa gipagula nga artikulo nga nabutang sa kontrobersiyal ang opisyal sa NBI gumikan sa gikanayong ‘for the boys’.
Gihimong basehan sa reklamo ang gisulat ni Caduaya kalabot sa entrapment operation sa NBI-Semro 11 kaniadtong bulan sa Agosto sa Upside Down, Inside Out, sa Plaza Roman KTV Bar Compound nga nahimutang sa Cabaguio Ave., ning siyudad.
Mipalag sumala pa si Rosales sa gipagula nga impormasyon nga makadaut sa iyang reputasyon human nga daw gipasangilan siya nga usa ka corrupt nga opisyal.
Kahinumduman nga gilambigit si Rosales ug mga personahe sa NBI-Semro 11 sa gikanayong pagpangayo ug saburno sa nanag-oya sa maong bar sa kantidad nga P500,000.
