DAVAO CITY – Walay nakitang foul play ang kapulisan kalabot sa patay’ng lawas sa usa ka lalaki kinsa nadugta na ug narekober sa creek sa milabay nga adlaw sa Barangay Malagos, Baguio District ning siyudad.
Una ng giila sa kapulisan ang biktima nga si Jeffrey Ian Balangan Lapitan, 41 anyos, gituohang naaksidente ug nahagbong sa creek samtang lango sa ilimnong makahubog.
Sa inisyal nga imbestigasyon sa kapulisan, ayha sumala pa nakaplagan ang patay’ng lawas niini, nakita pa ang biktima nga nag-inom kauban ang iyang mga higala sa usa ka tindahan sa Purok 6, New Cogan, Barangay Malagos, Baguio District apan kalit na lamang kini nga nawala. N
adiskobrehan ang patay’ng lawas niini sa 14 anyos nga si Joseph Diacor, human ang pito ka adlaw nga pagpangita.
Nakaangkon sumala pa si Lapitan ug grabe nga head injury ug contusion sa iyang dughan.
Ilado sumala pa nga maayong tawo ang nahisgutan bisan tuod nga kusog kini nga mo-inom ug ilimnong makahubog.
Tungod niini, nagpahimangno ang Station commander Police Major Achilles Bargio ngadto sa publiko nga hinay-hinay lamang sa pag-inom alang sa kaluwasan ug malikayan ang susama nga insidente diin namatay ang biktima tungod sa grabe nga kahubog.
Gihaya ang patay’ng lawas sa biktima sa usa ka lokal nga punerarya ning siyudad.
