DAVAO CITY – Diretso nga gipaslak sa presohan sa Sta. Ana Police Station ang usa ka 31 anyos nga lalaki kinsa nalambigit sa pagpamaligya ug ginadili nga druga.
Una ng naila ang dinakpan nga si Mark Anthony Garcia Simbajon alyas Mads, residente sa Ruiz Vill. San Antonio Agdao 3 ning siyudad.
Gibaligyaan sa nahisgutan ug illegal nga druga ang pulis nga nagpaka-arun ingnon nga poseur buyer hinungdan nga diretso kini nga giposasan.
Narekober gikan sa iyang posisyon ang pakete sa illegal nga druga nga kantidad sa P3,000.
Nasikop ang nahisgutan samtang gipahigayon ang transaksiyon sa Bangoy St. Corner Lapu-lapu Brgy. Agdao Proper ning dakbayan.
Paslak karon sa presohan ang nahisgutan ug mag-atubang ug kasong paglapas sa Republic Act 9165 kun comprehensive dangerous drugs act of 2002.
Gikustodiya na sab sa kapulisan ang mga narekober gikan sa suspek nga maoy gamiton nga ebidensiya sa iduso nga reklamo batok kaniya.
