Gibasura sa Korte Suprema ang nagkahiusang mga petisyon nga nagkuwestiyon sa proseso sa House of Representatives Committee on Justice sa impeachment complaints batok kang Vice President Sara Duterte.
Sumala sa Korte Suprema, nahimo nang moot o wala nay angayng resolbahon ang mga isyung gipasaka tungod kay naaprubahan na sa Kamara ang Articles of Impeachment ug naipadala na kini sa Senado, nga karon naglingkod isip Impeachment Court.
Sa resolusyon sa Korte Suprema, gilakip sa gibasura ang nagkalainlaing petisyon nila Atty. Israelito Torreon ug Vice President Duterte nga nagkuwestiyon sa findings sa House Committee on Justice.
Gipasabot sa Korte Suprema nga sa dihang na-transmit na ang Articles of Impeachment ngadto sa Senado, nahuman na ang papel sa House of Representatives sa impeachment process. Busa, bisan unsa pa ang mahimong desisyon sa hukuman kabahin sa mga aksyon sa Kamara, dili na kini makausab sa dagan sa maong kontrobersiya.
