DAVAO CITY – Nagpatuman karung adlawa ug pagsuspende sa klase ang lalawigan sa Davao de Oro gumikan sa nasinatiang walay undang nga mga pag-ulan.
Sa gipagula nga kamandoan ni Gobernador, Jayvee Tyron Uy, tanan nga lebel sa mga pribado ug pampublikong tulonghaan sa probinsiya ang dili una tugtan nga mag-klase sanglit adunay posibleng mga pagbaha ug pagdahili sa yuta gumikan sa kusog nga pag-ulan hatud sa Low Pressure Area (LPA).
Gani gipa-activate na sab karon ang mga sakop sa Municipal ug Provincial Disaster Risk Reduction and Management Office sa lalawigan aron nga dali kini nga maka-responde sa higayon nga adunay ipatuman nga pagpabakwit sa mga residente.
Gipahimangnoan na sab ang mga nanimuyo sa mga lugar nga sagad baha-on ingon man makasinate ug landslide nga mas maayong dili na maghulat mohikling gilayon kung adunay pagsaka sa tubig sa mga kasapaan.
