Gipangayo ni Lanao del Sur Rep. Zia Alonto Adiong sa National Bureau of Investigation (NBI) nga imbestigahan ang nahimong pahayag ni kanhi Pangulong Rodrigo Duterte mahitungod sa pagpatay sa 15 ka mga senador aron makalingkod ang ilahang mga kandidato.
Matod pa sa magbabalaod, kung mihimo ug imbestigasyon ang NBI sa matod pa pagpanghulga ni Vice Presidente Sara Duterte kang Pangulong Ferdinand Marcos jr., First Lady Liza Araneta-Marcos ug Speaker Ferdinand Martin Romualdez, angay imbestigahan usab ang nahimong pamahayag sa kanhi pangulo.
Kung kahinumduman sa panagtapok nga gipahigayon sa San Juan City, nagpagawas ug pahayag ang kanhi presidente sa nagkaduol nga eleksyon ug sa kasamtangang komposisyon sa Senado.
Sa iyahang pagpamulong, nagsugyot kini ug usa ka radikal nga pamaagi aron maseguro na ang kadaugan sa mga kaalyado niining kandidato.
Ang nahimong pamahayag niini ang gisugat usab sa makusog nga panagsinggit gikan sa mga supporters ug dungan usab misinggit nga “Kill! Kill! Kill!” Gikanayon pa ni Rep. Adiong, dili angay baliwalaon ang ingon niining pamahayag, ilabi na nga adunay higayong gihimo kini sa mga supporters ni Duterte ang iyang gipangsulti.
Gihisgutan usab niini nga bisan paman nga mamahimong isulti ni Duterte nga komedya lamang ang mga gipangsulti niini, apan dili pwedeng itago sa joke ang pagpanghulga niini batok sa mga senador.
