DAVAO CITY – Gipaklaro sa Department of Trade and Industry kon DTI 11 ang mga konsumante mahitungod sa ilahang mga katungod sa pagpamalit sa mga produkto sa merkado.
Sa nahitabong pakighinabi sa Bombo Radyo Davao kang Atty. Dianne Bay Grado, ang opisyal sa Legal Consumer Protection Division sa DTI 11, gipasabot niini ang walo ka mga katungod sa mga konsumante nga nahisubay sa Republic Act 7394 kon Consumer Act of the Philippines.
Sama na lamang sa right to basic needs o ang katungod sa mga nag-unang panginahanglan sa mga mamalitay sama sa pagkaon;
right to safety nga nagsiguro sa kaluwasan sa matag produkto;
right to information aron makahibalo ang katawhan sa mga rekado, benepisyo ug uban pang panguhaan sa maong produkto.
Right to choose kon ang paghatag og saktong presyo bugti sa maayong kalidad sa produkto;
right to representation kon ang katungod sa pagpasibaw sa bisan unsang mulo o pagdayeg sa maong produkto;
right to redress kon ang katungod nga mabayloan ang mga sayup o depektibong produkto o serbisyo sa gilauman sa mga konsumante;
right to consumer education o ang pagbaton og kaalam sa pagpamalit;
ug ang right to a healthy environment alang sa luwas nga merkado nga haum alang sa tanan ug sa kinaihayan.
Samtang gipunting sab sa opisyal ang lima ka responsibilidad sa matag konsumante sama sa Critical Awareness kon pagkametikuloso sa pagpamalit og produkto;
Action kon paglihok alang sa tama ug patas nga pagpamalit ug pagpamaligya; Social Concern nga alang sa pagpasayod sa mga pinakabulnerable ug nagkalisod nga katawhan;
Environmental Awareness kon ang tulubagon sa mamahimong epekto niini sa kinaiyahan;
ug ang Solidarity alang sa pagmugna og nagkahiusang kusog nga tapok sa mga konsumante.
Taliwala pa man sa kinatibuk-ang katungod sa mga konsumante, gikanayon ni Atty. Grado, nga dili mamahimong applicable ang pamulong nga “customer is always right” ilabi na sa panahon karon.
Matod pa sa sitwasyon nga adunay pailisan nga produkto gumikan sa nagkalain-laing presyo, ilawom sa Republic Act 7394 kon Consumer Act of the Philippines, mamahimong ipailis lamang kadtong mga depektibong produkto nga wala nakakab-ot sa laumang benepisyo niini.
Tambag pa sa opisyal, mas pili-a ang produkto nga barato o haom lamang sa mga panginhanglanon isip konsumante.
Kon ugaling makapa-reserve sa produkto, mamahimo lamang nga i-cancel ang order gawas na lamang kon naay agreement nga nahitabo tali sa buyer ug seller.
Nag-awhag sab ang DTI 11 ngadto sa dunay mga suliran mahitungod sa gipalit nga produkto o serbisyo pinaagi sa pag-adto sa pinakaduol nga opisina sa ilahang lokalidad, o dili kaha sa mga social media pages, website ug contact number sa ahensya.
via || Bombo LJF
