Gilauman nga makaabot na karong hapon sa Pag-asa Island ang mga youth volunteer sa Atin Ito Coalition sakay sa MV Kapitan Felix Oca aron personal nga maghatod sa mga gikinahanglang suplay alang sa mga residente ug komunidad sa maong isla.
Sa wala pa ang ilang gipaabot nga pagdunggo, lain-laing aktibidad una ang gihimo sa mga boluntaryo ibabaw sa barko samtang naglayag paingon sa West Philippine Sea.
Sumala sa report, naghimo ang mga kabatan-onan og usa ka sunset yoga session kagahapon, adlaw nga Biyernes, sa deck mismo sa MV Kapitan Felix Oca aron mapadayon ang ilahang maayong kondisyon ug kaaandam sa misyon.
Ang maong aktibidad kabahin lamang sa serye sa mga programang giandam sulod sa barko nga gisugdan pa niadtong Mayo 1.
Isip paghandum sa Labor Day, adunay sayong programa ang grupo aron pasidunggan ang mga mananagat nga mga Pilipino ug mga frontline workers nga padayon nga nanginabuhi ug nagbantay sa teritoryo sa nasod.
Gawas niini, nagpatuman usab ang mga boluntaryo og film screening nga nagtuki sa isyu sa West Philippine Sea, ingon man usa ka rap workshop aron mas mapalig-on ang panaghiusa sa mga partisipante.
