Mokapin sa 300,000 ka miyembro sa Iglesia ni Cristo kon INC, ang misalmot sa National Peace Rally sa San Pedro Square, ning dakbayan sa davao.
Sa taho sa Davao City Police Office kon DCPO, mokabat og 370,000 ka mga miyembro sa INC nga mitambong sa rali.
Nagsugod matud pa og abot ang mga tawo pasado alas 2:00 sa kabuntagon, ug ang kalihukan pormal nga gisugdan pasado alas 8:00 sa buntag ug natapos kini uban ang pag-ampo alas 5:30 sa hapon.
Gikanayon sa DCPO nga adunay 4,847 ka safety and security personnel ang gipakatag alang sa peace rally.
Sa maong ihap, 2,204 gikan sa DCPO, 2,472 gikan sa uban pang security clusters, ug 112 gikan sa force multipliers.
Sumala pa ni Police Colonel Hansel Marantan, city director sa DCPO, nga ang kalihukan nagmalinawon ug walay mga dili maayo nga insidente ang nahitabo.
Matud pa niini, nga bisan paman sa kabaga sa mga tawo, ang DCPO wala maglisud sa pagdumala niini gumikan kasagaran sa mga miyembro sa INC nagatuman kanunay sa balaod.
Dugang pa sa opisyal, nga bisan paman nga election ban, ang ilang buhatan wala maglisud gumikan ang mga miyembro sa INC adunay mga inisyatiba sa ilang kaugalingon aron nga magpabilin ang kalinaw ug kahapsay samtang nagpadayon ang maong rally.
Samtang, anaa usab sa kapin 2,000 nga suporter sa mga Duterte ang nagtigum sa Freedom Park sa Davao City alang sa “Walk for Peace”, kagahapon sa susama nga adlaw sa National Peace Rally.
Nagmartsa kini sa Roxas Avenue padulong sa C. Bangoy Street, ug niduyog sa mga miyembro sa Iglesia ni Cristo (INC) sa San Pedro Square.
Kahinumdoman nga ang Konseho ning dakbayan, nag-aproba niadtong Enero 7, 2025 sa temporaryo nga pagsira sa pipila ka mga kadalanan sa Davao City aron nga iakomodar ang dinungan nga peace rally.
Dunay parsiyal nga pagsira sa dalan nga maapektuhan ang San Pedro Street, C.M. Recto Avenue, Pelayo Street, Iñigo Street, C. Bangoy Street, Rizal Street, Bonifacio Street, ug Palma Gil Street.
Nakasinati sab og parsiyal nga pagsira ang Davao City Coastal Road gikan sa Tulip Drive hangtud sa Bago Aplaya.
