DAVAO CITY – Kapin tres mil (3,000) ka mga residente ang gipabakwit sa mga otoridad gumikan sa nahitabong kalit nga pagbaha sa Poblacion area sa Pantukan, Compostela Valley Province sayo sa buntag karong adlawa.
Subay sa impormasyon nga gipagula sa Office of the Municipal Mayor of Pantukan, anaa sa 675 ka pamilya o 3,375 ka mga indibidwal ang mihikling tungod sa baha sa maong lugar.
Sumala kang Pantukan Mayor Roberto Yugo, anaa sa kapin 24,000 ka mga residente sa Pantukan ang apektado gumikan sa maong baha.
Samtang sa pikas bahin, anaa na karon sa duha ka mga evacuation centers ang mga apektadong pamilya gikan sa 17 ka mga purok sa upat ka mga barangay.
Sa maong panghitabo, adunay upat ka mga tao ang angol samtang 17 ka mga panimalay ang totally damaged ug 4 sab ang partially damage.
Hinoon, walay gikatalang patay sa maong kalit nga pagbaha.
