DAVAO CITY – Nagpadayon ang imbestigasyon sa pagpusil patay sa PUJ driver nga si Michael Justine Tamba Bangot niadtong Hulyo 13 sa hapon.
Sumala sa Los Amigos Police Station, posibleng personal nga pagdumot ang hinungdan sa wa mailhing suspek diin kumpirmado sab nga nakadawat ang biktima og mga bahad sa kinabuhi.
Sa pagkakaron, duna’y gitudlo nga mga person of interest ang otoridad sa maong krimen.
Kahinumduman nga nakabsan sa kinabuhi ang drayber human kini pusila sa wala mailhing suspek samtang nakapark ang gimanehong sakyanan niini sa Purok 8-A, Campo 5, Barangay Los Amigos, Tugbok, Davao City, Hulyo 13 ning tuiga.
Subay sa imbestigasyon, una nahitabo ang krimen, giparada sa biktima kauban ang iyang konduktor aron i-tsek ang ligid.
Sa dihang kalit gipusil ang biktima sa usa ka suspek nga nagsakay og motor nga adunay sul-ob nga yellow helmet ug itom nga t-shirt.
Nakahimo pa sa pagdagan ang biktima palayo sa suspek, apan gisundan siya niini ug didto gilubngan og taman sa bala.
Paspas usab nakadagan palayo sa lugar ang konduktor human nga nalisang sa maong panghitabo.
Nakahiagum ang biktima og duha ka samad sa likod ug usa sa abaga ug laing usa sa walang bahin sa iyang lawas.
Sumala pa sa saksi, dunay suot nga black tshirt ug sakay sa pula nga XRM motorcycle ang gunman nga nagpusil sa biktima.
via || Bombo DF & Bombo LJF
