DAVAO CITY – Padayon karon nga nadungagan ang ihap sa mga indibidwal nga apektado sa cholera outbreak sa Caraga Davao Oriental nga nagsugod sa milabay nga semana. Sa ulahing datus, sukad nga nagsugod ang outbreak, mikabat na karon sa 544 indibidwal ang apektado.
Nagpabilin sab karon nga anaa sa unom ang mga natalang namatay sa maong insidente. Sa nahisgutan nga ihap, 293 niini ang naka-confine sa evacuation center nga gi-covert karun isip makeshift hospital ug uban pang infirmaries sa probinsiya.
Nauna na sab nga gibutyag ni Karen Lou Deloso, provincial information officer, nga padayon ang provincial government nga makiglambigit tali sa local government unit sa Caraga ug nagkadaiyang agencies isip tubag sa cholera outbreak.
Kahinumduman una na sab nga nagpadala niining milabay nga adlaw ang Davao Oriental government pinaagi sa ilang provincial health office (PHO) ug provincial disaster risk reduction and management teams ug dugang supply sa medisina ug manpower sa mga apektado sa outbreak.
Gihatagan na sab ang mga residente sa nahisgutan nga dapit ug water purifiers nga gikan sa mga pribadong sector aron nga masiguro nga ang tubig mainom sa mga residente ang limpiyo ug luwas.
Kalakip sa mga nahimong lakang karon mao ang sunod-sunod nga shock chlorination sa water source sa Barangay Santiago, diin nananukad ang outbreak kini arun temporaryo nga masolusyonan ang problema sa lugar.
Gani plano sab sumala pa karon nga magtukod ug bag-ong water system sa barangay aron masiguro ang potable water sa mga residente.
