Gipasiguro sa International Criminal Court nga dili maapektuhan ang pagpadayon sa mga kaso nga ilang gidumala bisan pa sa pagtangtang sa katungdanan kang ICC Chief Prosecutor Karim Khan.
Natangtang si Khan human 82 sa 125 ka miyembrong estado sa Assembly of States Parties ang mibotar pabor sa iyang pagpahawa atol sa secret ballot nga gihimo sa United Nations headquarters sa New York.
Ang maong desisyon gisunod sa imbestigasyon nga naglambigit kang Khan sa mga alegasyon sa sexual misconduct, coercion ug serious breach of duty nga adunay kalabotan sa usa ka babayeng staff sa ICC. Gipanghimakak ni Khan ang tanang alegasyon ug giingon sa iyang legal team nga dili patas ang proseso sa iyang pagtangtang.
Bisan pa sa iyang pagkatang-tang, gipaklaro sa ICC nga magpadayon ang tanang imbestigasyon ug pagdungog sa mga kaso ubos sa pagdumala sa mga deputy prosecutors samtang nagapangita pa kini og bag-ong chief prosecutor.
Kahinumdoman nga si Khan ang nangulo sa Office of the Prosecutor sa dihang gipadayon sa ICC ang imbestigasyon sa kampanya kontra iligal nga droga sa administrasyon ni kanhi Pangulong Rodrigo Duterte. Sa sayong bahin sa 2025, ang iyang opisina maoy mihangyo sa korte nga magpagula og arrest warrant batok kang Duterte.
Apan sa ulahing bahin sa 2025, gidiskwalipikar si Khan sa pagdumala sa kaso ni Duterte human giingon sa ICC Appeals Chamber nga ang iyang kaniadtong pagrepresentar sa pipila ka mga biktima sa drug war kaniadtong 2018 mahimong makamugna og “appearance of bias.” Sa wala pa magsugod ang pagdungog sa kaso, ang tanang bulohaton may kalabotan sa proceedings sa Pilipinas gibalhin na ngadto sa iyang mga kaubanan.
