Nagkauyon ang House prosecution ug defense panel sa pipila ka “common exhibits” atol sa pagpadayon sa impeachment trial batok kang Bise Presidente Sara Duterte karong Lunes, Agosto 3, may kalabotan sa alegadong misuse sa confidential funds. Sumala pa sa korte, ang stipulation of common exhibits mao ang kasabutan sa duha ka panig nga dawaton ang pipila ka ebidensya isip kabahin sa kaso, nga dili na kinahanglan nga dugangan pa og pagpamatuod sa ilang pagkatinuod.
Dugang pa niini, unang mihangyo si House Prosecution counsel Atty. Lorna Kapunan sa Senate Impeachment Court nga i-stipulate ang mga common exhibits tali sa prosecution ug depensa, diin nangayo usab og lima ka minutos nga suspensiyon si Defense counsel Atty. Michael Poa aron masusi pag-ayo ang maong hangyo.
Sa pagpadayon sa pagtaral, miuyon ang defense panel ni VP Sara Duterte sa pipila ka documentary evidence sa prosecution, apan gisupak niini ang 845 ka acknowledgment receipts gikan Disyembre 21 hangtod 31, 2022. Wala usab dawata sa depensa ang proposed stipulation nga nag-ingon nga nadawat sa Office of the Vice President (OVP) ang P125 milyon nga confidential funds niadtong Disyembre 20, 2022 ug nagasto sulod lamang sa 11 ka adlaw.
Samtang, giuyonan sa depensa ang mga dokumento kabahin sa P37.5 milyon nga quarterly confidential funds sa Department of Education (DepEd), P125 milyon nga confidential funds allocation sa OVP niadtong Disyembre 2022, ug ang pagkuha sa quarterly allocation sa OVP ug DepEd gikan sa unang hangtod ikatulong quarter sa 2023. Giila usab sa depensa nga gipirmahan sa mga awtorisadong opisyal ang mga dokumentong gisumite sa OVP ug DepEd.
Gipasalamatan ni Atty. Kapunan ang depensa sa ilang pag-uyon sa pipila ka ebidensya, samtang gipasalamatan usab ni Trial Presiding Officer Francis “Chiz” Escudero ang duha ka panig tungod sa ilang kooperasyon aron mapadali ang pagtaral. Sa pagkakaron, gipahayag ni Kapunan nga nakamenos sila og 10 ka kahon sa ebidensya gikan sa kinatibuk-ang 15 ka kahon human sa maong kasabutan.
