Gipangpatay sa mga armadong grupo ang halos 200 ka tawo sa managlahing massacre sa remote villages sa central ug northern nga bahin sa Nigeria. Sa central Kwara state, gi-ataki sa mga armado ang komunidad sa Woro nga mibilin ug 170 ang patay.
Kini na ang deadliest assault nga gikatala karong tuiga sa ditrito nga adunay utlanan sa Niger state, ang lugar nga gi-target sa mga armado nga mi-ataki sa mga village, nangidnap ug mga residente ug nangawat ug mga hayop.
Samtang sa lahi nga pagpangataki sa northern Katsina state, gipatay sa mga armado ang 21 ka tawo, gipangsulod ang mga pinuy-anan ug gipangpusil ang ilahang mga biktima, matod pa sa lokal nga kapulisan.
Matod pa gipalibutan sa mga armado ang mga residente, gipanggapos ang mga kamot gipamusil dayon ang mga biktima. Gikatuhuang jihadists ang mga nagpaluyo sa massacre nga nag-preach sa village.
Nanawagan kini sa mga residente nga i-atras ang ilahang suporta sa Nigerian state ug mubalhin sa sharia o islamic law. Sa dihang wala mi-uyon ang mga residente, dinhi na nagsugod ang pagpamusil sa mga militanteng grupo.
Gawas niini, nasupak ang unom ka bulang peace deal tali sa komunidad ug armadong grupo. Samtang nakigtinabangay na ang Nigerian authorities sa Estados Unidos aron mapakusgan ang seguridad, samtang gipanghimakak nga adunay sistematikong persekyusyon sa mga kristyano.
