Igo na lang sa pagbangutan ang usa ka babaye human nga girakrakan ang iyang anak ug apo sa wala pa mailhing lalake samtang namaligya lamang og beef pares sa Brgy. San Gabriel, San Pablo City, Laguna niadtong milabay nga adlaw.
Nasayrang mugradweyt na isip abogada ang 30 anyos nga biktimang giilang si Rhea Lunar karong Oktobre, samtang ang iyang 11-month old nga baby ang gikatakda sab nga bunyagan sabay sa adlawng natawhan niini karong Setyembre 1 ning tuiga.
Subay sa imbestigasyon, alas 8 pasado niadtong Agosto 11 ning tuiga, igo ra nagkaon samtang ginakugos sa biktima ang iyang anak.
Apan sa wa damhang higayon, kalit matud pa silang gipamusil sa wala pa mailhing suspetsado nga nakasuot og itom nga jacket ug pantalon, samtang ang lookout niini nakasuot sab og itom nga helmet, jacket ug pantalon.
Human sa pagpamusil gamit ang .45 nga pistola, gilayong misibat sa wa matinong direksiyon ang mga suspek.
Nakahiagom og 6 ka samad pinusilan ang biktima, samtang ang baby niini nakabaton og 3 ka samad pinusilan.
Sa karon, anaa na sa luwas nga kahimtang ang inahan sa mga biktima kansa 58 anyos, nanawagang matunol ang hustisya sa hinanaling panahon.
Saysay sa inahan/lola sa mga biktima, wala matud pa silay nahibaluan nga dunay kaaway ang biktima, gani, ilaha na lamang matud pa nilang iampo ang nagbuhat sa mangilngig nga krimen.
Nasayrang 3 pa kabulan naga-abang sa ilang tindahan ang biktima ug anaa pa lamang sa 8 kaadlaw nga namaligya sila og beef pares.
Gani, gibutyag ni San Pablo City Police chief, Police Lt. Col. Redante Tiraña nga posibleng ang mga biktima gayod ang target sa mga suspek gumikan ang inahan/lola sa mga biktima, gamayng samad lamang ang nahiaguman.
Hinoon, duna nay lead ang kapulisan, apan di matud pa nila kini mapagawas aron di mabulilyaso ang ilang imbestigasyon ug operasyon.
