Dugangan na sa Gobyerno sa Pilipinas ang fuel discount alang sa mga drayber sa pampasaherong jeep ug UV Express.
Sumala kang Executive Secretary Ralph Recto, mahimong ₱12.00 kada litro ang fuel discount gikan sa miaging ₱10.00 kada litro.
Magsugod ang pagpatuman niini sa Agosto 15,2026 diin gilauman nga makatipid ang mga drayber og hangtod ₱1,800 kada semana.
Gipadayag ni ES Recto nga ang desisyon sa pagdugang sa fuel discount alang sa mga operator ug drayber sa public utility vehicles (PUV) gidesisyunan atol sa Cabinet meeting nga iyang gipangulohan kaniadtong Martes, Agosto 4,2026 sa Malacañang, subay usab sa mando ni Pangulong Ferdinand “Bongbong” Marcos Jr.
Hinuon, wala pa gipahibalo sa opisyal kung hangtod kanus-a magpadayon ang programa ug kung pila ang pondo nga gigahin sa gobyerno alang sa fuel discount.
Una nang gipahibalo sa Palasyo nga matapos karong Agosto ang pagpatuman sa ₱10.00 nga fuel discount program.
