DAVAO CITY – Gatusan ka mga tawo ang misalmot sa gipahigayon nga unity walk nga gipaluyohan sa probinsiya sa Davao del Sur niining milabay nga adlaw nga tumong ang pagtapos sa paghitak sa ginadili nga droga sa nahisgutan nga area.
Ang maong aktibidad adunay kalabotan sa Drug- Abuse Prevention and Control Week uban ang tema nga “Katarungan para sa Kalusugan, Kalusugan para sa Katarungan”.
Sumala pa sa Davao del Sur Police Provincial Office (DSPPO), ang mga partisipante ang naggikan sa mga nagkadaiyang ahensiya, academe, government employees ug pribadong indibidwal gikan sa probinsiya.
Dala sa mga nahisgutan ang mga placards ug adunay mga mensahe nga nagkondena sa iligal nga droga.
Gisalmutan sab ang maong aktibidad ni Governor Douglas Ray Cagas, Vice-Governor Mark Cagas, Digos City Mayor Joseph Cagas, Provincial Prosecutor Teresita Recto, Philippine Drug Enforcement Agency-11 director Antonio Rivera, ug Police Col. Alberto Lupaz, DSPPO director.
Gitataw sab ni Lupaz nga kontento sila sa daghanang suporta gikan sa nagkadaiyang sektor nga nakighiusa sa nahisgutan nga panawagan.
