Gikonsidera sa kampo ni Senador Sherwin Gatchalian ang posibilidad sa pagsang-at og mga kaso batok sa mga indibidwal nga mitambong sa pagpahigayon sa Senate Blue Ribbon Committee nga gipangulohan sa kampo ni Senador Alan Peter Cayetano, tungod sa giingong kakulang sa parliamentary immunity.
Matud ni Senador Panfilo Lacson, posibleng mapasakahan og cyber libel ug uban pang mga kaso ang mga misalmot sa maong pagdungog tungod kay giisip kini nga “bogus” o walay legal nga balido ubos sa kasamtangang liderato sa Senado.
Dugang pa ni Lacson, dili mahimong gamiton isip depensa ang parliamentary immunity tungod kay dili sumala pa opisyal ang gihimong pagdungog niadtong Huwebes, Hunyo 11.
Gisuportahan usab kini ni Senador Francis Pangilinan nga mibutyag nga walay bisa ang immunity sa mga nitambong tungod kay dili kini pormal ug opisyal nga proceedings sa Senado.
Kabahin sila Lacson ug Pangilinan sa paksyon ni Gatchalian nga nagdeklara nga bakante ang tanang posisyon sa Senado human sa tulo ka adlaw nga wala motambong sa plenary sessions ang mga Majority senators sa Taas nga balay balauranan.
Una nang gibarugan ni Senador Alan Peter Cayetano nga siya gihapon ang lehitimong Senate President ug adunay katungod sa pagpahigayon sa Blue Ribbon hearing nga gipangulohan nila Senadora Pia Cayetano ug Senador Rodante Marcoleta.
