DAVAO CITY – Nag-awhag ang Family Planning Organization of the Philippines nga ikonsidera ang saktong pagbaton og pamilya pinaagi sa family planning.
Sa nahimong pakighinabi sa Bombo Radyo Davao, gikanayon ni Hermie Escalante gikan sa FPOP – Davao Region nga mikunhod ang fertility rate sa nasud gikan 3% kaniadtong 2020 ngadto sa 1.8% karug tuig.
Nahimong dakong rason niini ang nahitabong pandemya gumikan sa pagpili sa mga magtiayon nga magbaton og gamay nga ihap sa mga anak.
Nasayran nga ning panahona, gamay nga ihap sab sa mga couple ang nagpakasal ug nagpabunyag sa ilang mga anak subay sa datos gikan sa Civil Registry.
Apan bisan pa man sa pag-ubos sa fertility rate sa nasud, nagkadaghan ang mga nagbaton og anak sa linghod pa nga pangidaron nga nagsugod sa diyes anyos pataas.
Sa Davao City, kapin baynte nuebe mil na ang natalang nagbaton og early pregnancy.
Kasagarang rason sa mga nahisgutan mao ang ilang kalaay tungod sa pandemya ug ilabi na ang sayop nga paggamit sa social media.
Dungag sab ni Escalante nga kinahanglang maedukar sa ginikanan ang ilang mga anak mahitungod sa sexual health aron mapanalipdan ang ilang kaugalingon sa pagbaton og dili maayong pagmabdos ug sayong pagbaton og pamilya.
Atol sa paghinumdom sa National Family Planning Month karung bulan sa Agosto, nagpadayon gihapong abli ang buhatan sa Family Planning Organization of the Philippines alang sa mga hisgutanan mahitungod sa family planning.
via || Bombo LJ Florendo
