DAVAO CITY – Nakipaghinabi si kanhi Pangulong Rodrigo Duterte aron tubagon ang mga pangutana mahitungod sa iyang mga pamulong sa nahitabong prayer rally sa Davao City niadtong Dominggo, Enero 28.
Partikular nga gipaklaro sa kanhi pangulo ang mga alegasyon mahitungod sa paggamit ni Pangulong Bongbong Marcos og ilegal nga droga nga unang gibutyag sa publiko, ug ang nahitabong pagkaalaot sa alyansa sa Marcos-Duterte team up gumikan sa nahitabong people’s intiative for charter change.
Sumala sa kanhi pangulo, freedom of expression lamang ang iyang gihimo ug wala kini kabalaka sa mga kaso nga ipasaka batok kaniya.
Pagpaklaro sa kanhi pangulo mahitungod sa paggamit niini og Fetanyl, giresetahan kini sa iyang mga doktor ug sukad niini, nagmaayo na ang iyang kahimtang ug wala na niya kinahanglana pa ang paggamit sa maong tambal.
Gisaway sab sa kanhi pangulo ang gipagulang kumpirmasyon sa PDEA nga wala sa drug watchlist si PBBM nunot sa naunang pamahayag nga nagagamit kuno ang pangulo ug ilegal nga droga.
Gihagit sa kanhi pangulo si PBBM nga magpa-drug test aron mapanghimakak ang mga akusasyon.
Gihinumdom sab ni Duterte ang panahon sa pagpangampanya kaniadtong 2022 elections diin iyang gibutyag nga suportado lamang niini ang iyang anak nga si Vice President Sara Duterte ug dili mismo ang tandem nila PBBM.
Awhag pa niini sa mga supporters nga hunungon na ang panagbangi, dungan sa pahimangno kang PBBM nga dili magpalabi sa iyang katungdanan ug mamahimong kontento sa mga nakab-ot sa paglingkod ninin sa pwesto.
Samtang atol sab sa nahitabong panagpulong sa mga mamahayag kang kanhi pangulong Rodrigo Duterte sa usa ka dagkong hotel sa dakbayan kagabii, gibarugan sab sa kanhi pangulo ang pamulong nga pagretiro niini sa pulitika.
Apan abli sab ang posibilidad alang kaniya nga mahimong political adviser. Nibirada sab ang pangulo ngadto sa COMELEC mahitungod sa pagdawat niini og mga pirma sa signature campaigns gikan sa mga peoples initiatives sa managlahing lugar.
Sumala pa nga i-validate ang mga nadawat nga pirma ilabi na kadtong mga nakadawat og kwarta bugti niini.
Gibarugan sa kanhi pangulo ang naunang pahayag nga ang Pangulo, ang First Lady nga si Liza Araneta – Marcos ug si House Speaker Martin Romualdez ang nagpaluyo sa maong inisyatiba sa pag-amyenda sa konsitusyon aron malugway ang ilang pagpangatundanan sa gobyerno.
Nagbahad pa si Digong nga kon ipadayon sa mga nahisgutan ang ilang laraw nga mulingkod og dugay sa Malacanang, mahisusama sab sa pagpalagput sa iyang amahan nga si Ferdinand Marcos Sr.
Laraw karon sa kanhi pangulo nga magpasaka og reklamo sa Korte Suprema batok kang Romualdez aron hunungon ang pagpahimulos sa kwarta sa katawhan mahitungod sa naghitak nga inisyatiba.
Gikanayon sab sa kanhi pangulo nga tumong sa gihingusgang constitutional change ang pagpabilin sa katungdanan sa mga opisyal sa gobyerno.
