Misaka sa 11 porseyinto ang resources sa financial system sa Pilipinas, nga nagpakita sa padayong kalig-on sa sektor sa pinansya sa nasud. Sumala pa sa datos sa Bangko Sentral ng Pilipinas, misaka ngadto sa kapin ₱37 trilyon ang kinatibuk-ang resources sa mga bangko ug non-bank financial institutions, nga naglangkob sa mga deposito, kapital, bonds ug uban pang financial assets.
Dugang pa niini, ang banking sector nagpabiling adunay pinakadakong bahin sa maong resources, nga giila nga usa sa mga nag-unang hinungdan sa padayon nga pagtubo sa financial system. Lakip sa mga nahimong hinungdan sa maong pagsaka mao ang lig-on nga pagdagsa sa mga deposito, pagtaas sa lending activities ug pagpalapad sa operasyon sa mga financial institutions.
Sa kasamtangan, giila sa mga ekonomista nga positibong timailhan ang maong kalamboan tungod kay nagpakita kini sa padayong pagsalig sa publiko sa sektor sa pinansya ug sa kapasidad niini sa pagsuporta sa pagtubo sa ekonomiya sa nasud.
