DAVAO CITY – Padayon sumala pa ang grupo sa mga magtutudlo ning dakbayan sa pag-lobby alang sa pag-apruba sa ilang sugyot nga financial assistance alang sa public school teachers apan dili na kini kang Mayor Inday Sara Duterte-Carpio inay kang Vice-Mayor Baste Duterte.
Sumala pa kang Alliance of Concerned Teachers – Davao City (ACT-Davao City) division president Reynaldo Pardillo plano nila nga hisgutan ang maong sugyot kauban ang bise Mayor sa mosunod nga tuig.
Nasayran nga ang ACT-Davao City mi-lobby na sa maong financial aid sukad 2018.
Giduso sa grupo ang P2,000 monthly financial assistance ug P2,500 quarterly rice subsidy alang sa tanan nga mga teaching ug non-teaching personnel.
Apan gibasura ni Mayor Sara Z. Duterte-Carpio ang maong sugyot dungan sa pagbutyag nga dili makahatag ang siyudad og pondo nga alang sa 11,959 Department of Education (DepEd) school personnel.
Kini ang nahimong rason nga nagbaton ug tensiyon ang grupo ug ang mayor diin gibutyag sa ACT-Davao nga ang siyudad lamang ang wala mihatag og subsidiya sa magtutudlo butang nga gikasuko sa Mayor.
Malipayon na matud pa ang mga magtutudlo kung makadawat sila og dyutay nga kantidad nga dakong tabang ilabi na nga misaka na sab karon ang mga presyo sa mga nag-unang palaliton gumikan sa gipatuman nga Tax Reform for Acceleration and Inclusion (Train) Law.
Hinuon, positibo ang union head nga paminawon pa gihapon sa lokal nga panggamhanan ang ilang hangyo.
