DAVAO CITY – Gitin-aw karon sa LTFRB 11 nga ang gikareport nga usbaw sa pletihan alang sa mga public utility jeepneys, buses, ug uban pang public transport ang dili pa epektibo dinhi sa dakbayan sa Dabaw ug gani ang tibuok Davao Region dili lakip sa mga dapit nga gi-aprubahan ang fare hike.
Sumala ni LTFRB XI Director Nonito Llanos III, wala pay official announcement gikan sa LTFRB Central office labot sa fare hike. Dugang pa ni Llanos nga mahinungdanon nga sutaon una ang mga official documents sanglit gipunting ang rason alang sa usbaw sa pletihan subay na usab sa pagtuon nga gihimo sa LTFRB.
Gitino usab ni Llanos nga sa Davao Region, wala pa silay nadawat bisan usa ka petition gikan sa unsa mang transport group alang sa usbaw sa pletihan. Gihangyo usab sa LTFRB ang publiko nga hulaton lamang una ang kamanduan gumikan kay kung makita sa ilang buhatan ang epekto sa pagsaka sa petrolyo, kinahanglan nationwide kining ipatuman bisan og walay petition gikan sa Region 11.
