Gipasiguro ni Energy Regulatory Commission (ERC) Chairperson Atty. Francis Juan nga dili na ipasa ngadto sa ubang bayranan ang kuhaon nga systems loss charge sa power bill sa mga konsumidor.
Sumala pa kang Atty. Juan, kini usa ka tubag sa kabalaka sa publiko nga basin ibalik lamang ang maong bayranan pinaagi sa laing power charge o usbon lang ang kategorya niini.
Dugang pa niini, sa inisyal nga panaghisgot sa mga ahensya sa gobyerno nga adunay direktang papel sa power sector, gipasabot nga kung tangtangon ang maong charge, kinahanglan nga mawala na gyud kini sa bayranan sa kuryente ug dili lamang i-recycle sa laing porma.
Matud pa sa ERC, pabor ang komisyon sa mga reporma nga makatabang sa pagpagaan sa gasto sa mga konsumidor, samtang gisiguro usab ang hapsay nga operasyon sa mga distribution utility.
Apan gipatin-aw ni Juan nga obligado gihapon ang mga distribution utility nga bayaran ang tibuok kantidad sa kuryente nga ilang madawat gikan sa mga generation company ug sa National Grid Corporation of the Philippines (NGCP).
Busa, kinahanglan klarohon kung kinsa ang mopas-an sa maong gasto kon matangtang na ang systems loss charge.
Lakip sa lakang sa ERC mao ang pakigtambayayong sa Kongreso, Department of Energy (DOE), uban pang ahensya sa gobyerno, ug mga stakeholder sa industriya aron maandam ang gikinahanglang balaod ug regulasyon alang sa maong reporma.
Sa wala pa kini, nagpahayag og kabalaka ang pipila ka distribution utility owner nga kung tangtangon ang systems loss charge, kinahanglan gihapon og mekanismo aron mabawi ang gasto nga may kalabotan niini.
Sumala kang Atty. Juan, kini ang usa sa mga butang nga kinahanglan hisgutan sa umaabot nga mga konsultasyon uban sa nagkalain-laing sektor sa power industry.
Sa kasamtangan, nagpabiling taas ang presyo sa kuryente sa Pilipinas tungod usab sa nagpadayon nga tensyon ug gubat sa Middle East nga nakaapekto sa presyo sa giangkat nga petroleum products sa nasud, diin dako nga bahin sa power generation ang nagsalig.
