Nagpahayag og kabalaka ang environmental group nga Interfacing Development Interventions for Sustainability sa nagkagrabeng problema sa basura sa Davao City tungod sa nagtapok nga wala makolektang mga basura sa mga karsada ug komunidad.
Matod sa grupo, nagdala kini og dugang nga peligro ilabina karon nga nagsugod na ang habagat o southwest monsoon.
Gipasidan-an sa IDIS nga ang wala makolektang basura mahimong maanod ngadto sa mga drainage system ug mga sapa panahon sa kusog nga ulan, nga makapasamot sa pagbaha ug mahimong hinungdan sa mga problema sa panglawas sa publiko.
Nanawagan ang grupo sa city government nga sulbaron dayon ang kakulang sa garbage collection ug palig-onon ang solid waste management system sa dakbayan.
Nahitabo kini samtang nagsaulog ang Davao City sa Duaw Davao ug Environmental Month diin gilauman ang pagdagsa sa mga bisita.
Gipunting usab sa IDIS nga kinahanglan ang mas epektibong waste segregation, partisipasyon sa panimalay ug barangay, lokal nga monitoring ug padayon nga edukasyon sa komunidad.
