DAVAO CITY – Muabot sa 317 ka mga estudyante ang nahimong bag-ong scholars sa dakbayan sa Davao. Kini mismo ang gi-anunsyo sa Educational Benefit System Unit (EBSU) dungan sa pagpagawas sa listahan sa mga estudyanteng kwalipikado sa educational assistance ilalom sa Scholarship on Tertiary Education Program (STEP).
Nasayran nga anaa sa halos 2,300 ka mga estudyante ang nag-apply apan anaa lamang sa kapin tres sientos ang nakasulod gumikan sa limitado nga slot. Gikanayon ni Emilio Domingo Jr., Technical Assistant sa EBSU, nga ang nahisgutang mga bag-ong scholars maoy nakapasar sa final assessment.
Dugang pa niini nga ang nahisgutang ihap ang gipili base na sab sa ilang grado ug economic status. Sa pikas bahin, human sa gihimong pag-anunsyo, gilayon usab nga gipahigayon ang scholars’ orientation alang sa mga bag-ong iskolar ng bayan.
Gitimbaya sab ni Davao City Mayor Sebastian ‘Baste’ Duterte ang mga nahisgutan atol sa Flag Raising Ceremony kagahapong adlawa. Hangyo na lamang sa mayor ngadto sa mga estudyante nga magtarong sa pag-skwela ug padayon nga magkugi aron mapabilin niini ang ilang naangkon nga scholarship.
