Dili kawatan kondili duha ka gutom nga bear cubs ang nakuratang nasakpan sulod sa usa ka balay sa Roxborough, Colorado.
Sumala sa report, mitubag ang mga deputy sa usa ka report sa giingong break-in, apan sa ilang pag-abot, duha ka batan-ong oso ang ilang nasakpan nga komportable nang nagsuroy-suroy sulod sa balay ug naglamoy pa sa pagkaon sa iring.
Base sa report, misulod ang duha pinaagi sa bukas nga bintana ug mura nag gihimong “all-you-can-eat buffet” ang pet food sa tag-iya sa balay.
Maayo na lang kay wala’y naangol sa insidente, ug sa tabang sa Colorado Parks and Wildlife, luwas nga napagawas ang duha ka “bisita” ug gibalik sa duol nga kalasangan.
Human sa nahitabong “walay imbitasyon nga panihapon,” nagpahimangno ang mga awtoridad sa publiko nga sirad-an ang mga bintana ug pultahan, ug ayaw ibilin sa gawas ang pagkaon sa mga alagang hayop aron dili na masundan ang susamang “pagbisita” sa mga oso.
