Balik sa bilanggoan ang usa ka 40-anyos nga suspetsadong drug pusher human kini madakpan sa usa ka drug buy-bust operation kagabii, Marso 18, 2026, alas 12:22.
Nagpahigayon og buybust operation ang sakop sa City Drug Enforcement Unit (CDEU) sa Digos Police Station sa Luna Street kanto Corregidor, Brgy. Zone 3.
Ang target sa operasyon mao si Alyas MEG, 40 anyos, nagpuyo sa Chapter 7, Barangay Aplaya, Digos City.
Gikumpiska gikan kaniya ang 20.73 grams nga droga (shabu) nga adunay Standard Drug Price nga Php 140,964.00. Sumala pa sa otoridad nga gikonsidera si Alyas MEG nga usa ka High-Value Individual (HVI), ug gituohan nga namaligya usab kini sa mga munisipalidad sa Hagonoy ug Padada sa probinsya sa Davao Del Sur.
Sumala sa natala sa kapulisan, kaniadto pang tuig 2002 hangtod 2011, nadakpan na kini tungod sa illegal nga droga sa Sta. Ana Police Station sa Davao City.
Samtang sa 2018, nadakpan usab kini sa Task Force Davao sa Sirawan, Toril, Davao City ug nakuhaan usab og droga ug nadala sa City Jail sa Davao City.
Apan kagabii, nasikop pag-usab sa kapulisan sa Luna Street, Digos City. Sa pagkakaron,gibalhog na sa selda sa Digos Police Station ang suspetsado samtang giandam na ang kaso batok kaniya tungod sa paglapas sa Republic Act 9165, o ang Comprehensive Dangerous Drugs Act of 2002.
