Gipahinumdoman sa Department of Labor and Employment o DOLE ang mga empleyado nga nakaangkon og injury nga may kalabotan sa trabaho nga mahimo silang makapangayo og kompensasyon atol sa epekto sa mga kalamidad sa nasod.
Lakip kini sa Employees’ Compensation Program sa Employees’ Compensation Commission o ECC, nga gitumong sa pagpanalipod sa kaayohan ug pinansyal nga seguridad sa mga mamumuo.
Sumala pa ni ECC Executive Director Kaima Velasquez, dili lamang limitado sa lugar sa trabaho ang sakop sa maong kompensasyon.
Dugang pa niini, ang maong pinansyal nga tabang mahimong magsilbing puli sa sweldo sa mga empleyado nga temporaryong dili makatrabaho tungod sa aksidenteng may kalabotan sa trabaho o sakit, hangtod sa ilang pagkaayo ug pagbalik sa normal nga trabaho.
Sa kasamtangan, mahimong mag-file og claim ang mga pribadong empleyado pinaagi sa Social Security System o SSS, samtang ang mga government workers mahimong mosumite sa ilang claims ngadto sa Government Service Insurance System o GSIS.
