Nagtuo ang Department of Justice (DOJ) nga nasayod na ang mga awtoridad kung asa nagtago si Pastor Apollo Quiboloy apan nag-amping lamang ang mga tinugyanan sa balaod sa pag-aresto aron malikayan ang dakong kagubot.
Kini ang gipahayag ni DOJ spokesperson ug Assistant Secretary Mico Clavano homan gipahayag ni Police Regional Office 11 director Brig. Gen. Nicolas Torre III nga nasayod sila nga nagtago si Quiboloy sa Kingdom of Jesus Christ(KOJC)compound.
Gipaneguro usab sa opisyal ipatuman nila ang insaktong lakang sa pag-aresto kang Quiboloy. Ang tumong lamang sa kapulisan nga madala ang pastor sa mga court hearings aron maatubang niini ang mga gi-atubang nga kaso.
Kung kahinumduman, gipahayag sa PRO XI director General Torre, nagtago lamang si Quiboloy sa KOJC compound sa Barangay Buhangin ning dakbayan sa Davao.
Apan dakong hagit sa ilaha ang pag-aresto kang Quiboloy gumikan sa kadako sa lugar nga gitago-an niini.
Mukabat sa 30 ka ektarya ang gilapdon sa compound ug adunay 41 ka mga istraktura.
Dugang pa sa opisyal nga tanang tima-ilhan nga anaa sa compound si Quiboloy ang positibo, subay sa nakuha nilang inpormasyon ug naglisod lamang sila nga sudlon kini gumikan sa pagbabag sa mga miyembro sa KOJC.
Samtang nakaandam na usab ang kapulisan sa higayong mo-eskapo si Quiboloy ginamit ang helicopter ug eroplano niini.
