Gipakusgan sa Department of Health o DOH ang mga lakang sa pagtubag sa pagdaghan sa mga kaso sa leptospirosis nga nalambigit sa pagkaylap nga pagbaha sa Metro Manila ug uban pang rehiyon sa nasod tungod sa Habagat.
Lakip sa mga gipalig-on nga lakang sa ahensya ang pagpaayo sa referral system ug pagsiguro nga igo ang medical supplies ug mga tambal sa mga ospital.
Dugang pa niini, nagdugang ang DOH og mga nurse sa mga ospital, lakip ang medical tents ug dugang nga cot beds aron matubag ang pagdagsa sa mga pasyente.
Aktibo na usab ang Express Lanes sa 33 ka DOH hospitals sa Metro Manila, Region I, II, III ug CAR aron mapadali ang pag-atiman sa nagkadaghan nga mga pasyente sa leptospirosis.
Sa pagkakaron, 155 ka pasyente sa leptospirosis ang na-admit sa San Lazaro Hospital ug hugot nga gimonitor samtang gihatagan og tukmang pag-atiman.
Gipahinumdoman sa DOH ang publiko nga magpakonsulta dayon sa labing duol nga health center o ospital kung makasinati og mga sintomas sa leptospirosis aron malikayan ang pagsamot sa kondisyon.
