DAVAO CITY – Gikumpirma ni Dr. Raquel Montejo, nagapangulo sa Local Heath Support Division sa Department of Health XI, nga anaa na sa 3,765 ka mga minor cases sa Adverse Effects Following Immunization kon AEFI ang natala nila sa tibuok Davao Region.
Gawas pa niini, aduna usab pito ka mga pasyente ang nakasinati og serious adverse effects human mabakunahan batok COVID-19 samtang 22 ang natalang namatay.
Sumala niya, kasagaran sa mga masinatiang adverse effect sa mild cases ang injection site pain, hilanat, taas nga blood pressure, labad sa ulo, rashes, muscle pain, ug kakapoy.
Dugang usab niya nga dili kaayo daghan ang adverse effects nga natala human ang second dose.
Wala pa usab silay gihuptan nga datos kalabot sa mga brand sa bakuna nga nagahatag og susamang side effects.
Samtang, wala pa usab nila matino kung duna bay kalabutan sa COVID-19 vaccine sa natalang 22 AEFI deaths, ug nagahulat usab sila sa pahayag sa National AEFI Committee kalabot niini.
