Gipanghimakak ni Sen. Panfilo “Ping” Lacson nga tinuyo nga gitakda ang P50-milyong pabuya ug ultimatum sa pagsurender ni Sen. Ronald “Bato” dela Rosa aron pugngan kini sa pagboto sa impeachment trial ni Vice President Sara Duterte.
Matod ni Lacson, espekulasyon lamang ang mga alegasyon nga ang maong lakang sa gobyerno nagtumong sa pag-impluwensiya sa pagboto sa impeachment case batok sa bise presidente.
Gipasabot ni Lacson nga sa pagkakaron, dili na sakop sa gahum sa impeachment court ang pagpugos kang Dela Rosa sa pagtambong, base sa naunang desisyon sa korte bahin sa gikinahanglang ihap sa mga boto aron makombikto ang usa ka opisyal.
Ubos sa maong desisyon, ang dos-terser (2/3) nga boto nga gikinahanglan aron makombikto ang usa ka opisyal ibase lamang sa mga senador nga legal ug aktuwal nga makahimo sa pag-apil sa husay.
Dili iapil sa ihap ang mga dili makatambong tungod sa mga kahimtang sama sa pagtago gikan sa mga awtoridad ug dili matino nga nahimutangan.
Sa pagkakaron, nagtago si Dela Rosa human gikataho nga adunay warrant of arrest batok kaniya gikan sa International Criminal Court (ICC) kalabot sa kampanya batok sa ilegal nga droga atol sa administrasyon ni kanhi Presidente Rodrigo Duterte.
Matod ni Lacson, lisod alang kang Dela Rosa ang pag-apil sa impeachment trial o pagboto nga dili mameligro nga madakpan.
Gihisgotan usab niya ang pagtambong ni Dela Rosa sa Senado niadtong Mayo 11 aron mobotar kang Sen. Alan Peter Cayetano sa pagpili sa Senate president.
Apan, gikataho nga mikalagiw si Dela Rosa gikan sa Senado human sa pagpamusil sulod sa bilding niadtong Mayo 13.
Gipasidan-an ni Lacson nga kon mobalik si Dela Rosa sa Senado aron lamang mobotar, dako na kaayo ang risgo nga iyang gisugal sa iyang kaugalingon.
Matod pa niya, kon makahimo si Dela Rosa sa pag-apil nga dili madakpan, mahimong magpatungha kini og mga pangutana bahin sa kaepektibo sa mga awtoridad sa pagpatuman sa balaod.
Una nang gipahibalo sa gobyerno ang P50-milyong pabuya alang sa ikadakop ni Dela Rosa, samtang gihatagan usab siya sa Philippine National Police og usa ka semana aron mosurender.
Gikuwestiyon usab sa mga abogado sa senador ang legalidad sa maong reward.
