Gidasig ni Interior Secretary Jonvic Remulla ang Department of Education (DepEd) nga ilakip sa pagtudlo sa mga estudyante ang hustong paggamit sa Emergency 911.
Pahayag kini ni Remulla atol sa National Simultaneous School Safety Drill, diin iyang gipasiugda nga importanteng masayran sa mga estudyante kung asa ug kinsa ang tawagan panahon sa emerhensya o kung adunay hulga ug kagubot sulod o gawas sa eskwelahan.
Sumala sa kalihim, makatabang ang kahibalo sa paggamit sa Emergency 911 aron mas dali makapangayo og tabang gikan sa mga awtoridad panahon sa kritikal nga sitwasyon.
Human sa mga insidente sa violence nga nalambigit sa pipila ka eskwelahan sa nasud, gipakusgan usab ang presensya sa Philippine National Police (PNP) sa palibot sa mga school premises.
Mitabang usab ang mga barangay tanod sa pagpatuman sa security measures sa pipila ka public schools, lakip ang pag-inspeksyon sa mga bag sa mga estudyante aron masiguro nga walay armas o delikadong butang nga madala sulod sa campus.
Tumong niini nga mapalig-on ang kahandam ug seguridad sa mga estudyante, magtutudlo ug school personnel panahon sa posibleng emerhensya.
