Gibarugan sa kampo ni Vice President Sara Duterte nga wala na gikinahanglan ang arraignment sa impeachment trial, human nilang ipresentar sa Senado ang ilang legal nga baruganan atol sa unang adlaw sa pagdungog. Sumala pa sa defense team, hapsay ug organisado ang dagan sa unang adlaw sa impeachment proceedings.
Giingon nila nga dili na angay ipatuman ang gisugyot nga arraignment diin unta ang Bise Presidente motubag og “guilty” o “not guilty” sa matag article of impeachment. Dugang pa niini, wala usab kini ipadayon sa Senado isip impeachment court. Lakip sa mipadayag si Atty. Michael Poa, spokesperson sa defense panel, nga nag-ingon nga ang ilang bug-os nga pagtagad sa pagkakaron nakasentro sa pag-andam ug pagpalig-on sa depensa ni Duterte batok sa mga alegasyong iyang giatubang.
Matud pa kaniya, wala pa nila mahimamat ang Bise Presidente human sa unang adlaw sa pagdungog sa impeachment trial, apan gilauman nilang makig-istorya kaniya sa umaabot nga mga adlaw aron hisgutan ang sunod nga mga lakang sa depensa.
Sa kasamtangan, wala pa usab makadesisyon ang legal team kung ilang irekomenda nga personal nga motambong si Vice President Sara Duterte sa mosunod nga mga pagdungog sa impeachment court. Kahinumduman, wala usab diretsong mitubag si lead defense counsel Atty. Shiela Sison kon kumpiyansa ba siya nga mapapas ang mga alegasyon batok sa Bise Presidente. Hinuon, gipasalig niya nga padayon ang ilang komprehensibong pagpangandam aron masiguro nga matubag ang tanang akusasyon subay sa balaod ug sa hustong proseso.
