Gipahigayon ni Davao City Police Office City Director PCol. Peter Bauzon Madria uban sa mga station commander sa Police Station 17-Baliok ug Police Station 3-Talomo ang coordinated patrols sa ilang tagsa-tagsa ka area of responsibility niadtong Agosto 19, 2026.
Kauban ni Madria sa maong kalihukan sila PMaj. Jemuel J. Mamolang sa Baliok ug PMaj. Sheryl Y. Bautista sa Talomo.
Dugang pa, gilakip sa patrol ang direktang pakig-istorya sa mga residente ug barangay officials aron mapalig-on ang koordinasyon sa seguridad sa komunidad.
Matud pa sa DCPO, importante ang aktibong pakiglambigit sa katawhan aron mas dali mahibal-an ang posibleng hulga ug mapatuman ang target hardening measures.
Lakip sa tumong sa coordinated patrols ang pagpugong sa krimen ug pagpalig-on sa police visibility sa mga lugar nga ilang ginabantayan.
Sa pagkakaron, padayon ang DCPO sa pagpatuman sa susamang patrol ug community engagement activities aron mapadayon ang kalinaw ug seguridad sa Davao City. | VIA BOMBO EROS PAJOTA
