DAVAO CITY – Naglaum ang Davao City Overland Transport Terminal (DCOTT) nga makatala ug 700 ngadto na sa 800 bus trips karung semana santa hangtud na sa Pasko sa pagkabanhaw sa domingo, Abril 17, 2022.
Sumala pa kang DCOTT head Aisa Usop nga lauman matud pa ang anaa sa 35,000 ngadto na 40,000 ka mga pasahero ang musakay sa 700 bus trips padulong sa mga nagkadaiyang destinasyon sa Davao region.
Gitandi kini sa opisyal sa sagad 600 bus trips sa DCOTT matag off-peak season. Sagad sumala pa sa mga biyahe ang paingon sa norte o Cagayan de Oro City ingon man sa Cotabato City areas.
Kung hisgutan ang seating capacity, gitataw ni Usop nga pabilin nila nga gituman ang limitado nga kapasidad isip pagrespeto sa protocols gikan sa point of destination sanglit aduna pa gihapoy mga lugar nga pabiling taas ang Alert Level Systems ug wala pa gitugot ang full capacity.
Nakiglambigit sab karon ang DCOTT sa Task Force Davao ug mga police personnel aron masiguro ang seguridad sa terminal atol sa peak season ingon man sa ahensiya sa Public Safety and Security Command Center.
Samtang ang Land Transportation Franchising and Regulatory Board-Davao ang gitahasan nga magmonitor sa mga bus units ingon man sa mga operator niini.
Gipahimangnoan sab ni Usop ang publiko nga pabiling isuot ang face masks ingon man mag-obserba sa guidelines nga gitakda sa terminal arun masiguro nga hapsay ang pagbiyahe sa mga indibidwal.
