DAVAO DE ORO – Naghatag og pagpaklaro ang Provincial Environment and Natural Resources Office sa Davao de Oro mahitungod sa nikatag nga komentaryo nga wala nagpakabana ang Probinsya sa pagpahibalo ug pagwarning sa Apex Mining Company mao nga adunay mga naapektohan ug nakabsan ug kinabuhi sa nahitabong landslide sa Barangay Masara sa Maco niadtong Pebrero 6, 2024.
Sumala sa gipagawas nga pamahayag ni Marilyn Perlas, ang Department Head sa Davao de Oro PENRO, kada adlaw adunay mga advisories nga gipagawas ang Probinsya pinaagi sa social media pages sa PLGU DDO ug PDRRMO ug mga radio messages bahin sa lakat sa panahon sugod sa Enero 15, 2024 hangtud sa mismong adlaw sa pagkahitabo sa landslide.
Dugang pa nga 24/7 pud ang monitoring sa PDRRMC Operation Center pinaagi sa mga MDRRMC Operation Center. Kini nga mga advisories, nag awhag sa tanang mga Mayors ug mga membro sa PDRRM Council nga ipahibalo sa tanang katawhan ug sector sa Probinsya ang posibleng epekto sa ‘shearline’ ug ‘trough sa LPA’ aron makabantay ug mahimong alerto ang tanan.
Alang sa mga minero, ang Probinsya, pinaagi sa PENRO-LGU, nagpagawas ug temporary suspension order sa mga small-scale miners niadtong January 16 ug niadtong January 29, ning tuiga tungod sa posibleng kalamidad resulta sa ‘shearline’ ug sa ‘trough of LPA’.
Kini base sa RA7160 o Local Code nga naghisgot nga ang small-scale mining usa ka devolved function sa DENR ngadto sa lokal nga pangagamhanan.
Gipasabot sab sa hingtungdan nga nga base sa RA 7942 kon Philippine Mining Act of 1995, nailalum sa national nga pangagamhanan, parktikularmente sa Mines and Geoscience Bureau sa DENR ang pagdumala sa large-scale mining operations.
Direkta ang linya sa MGB ngadto sa mga large-scale companies, busa, nagasalig ang Probinsya nga nakapadangat na ug haum nga advisories ang maong ahensya ngadto sa mga large-scale mining companies sama sa Apex Mining Company.
Angay usab mahinumduman nga ang mga large-scale companies adunay aprubado nga standard operating procedures sa tanan nga aspeto apil na niini ang mahitungod sa safety and risk assessment and management.
