DAVAO CITY – Nagbahad ang Davao City Mayor’s Office nga pananggalon sa listahan sa mga benepisyaryo sa Cash for Work Program ang mga nalambigit sa papetiks nga pamaagi aron makadawat ug hinabang gikan sa panggamhanan.
Sa pakighinabi sa Bombo Radyo Davao kang Shine Kintanar, opisyal sa opisina sa alkalde diri sa dakbayan, nasuta ang pipila ka mga Tupad Program beneficiaries nga nag-pictorial lamang aron pagpamatuod nga daw nabuhat nila ang ilang buluhaton subay na sab sa gipangayo sa maong programa.
Sigun pa ni Kintanar nga kon ugaling masakpan sila sa susamang buhat, adunay posibilidad nga dili na sila ug ubang myembro sa pamilya maka-avail pa sa uban pang mga programa sa panggamhanan. Gawas na sab sa maong programa ang mga nisalmot na human sa usa ka tuig.
Ang Lingap Program, usa sa mga programa sa City Government of Davao nga nagaawhag sa mga low wage earners sa dakbayan nga maka-income pinaagi sa simpleng paghiplig sa ilang mga komunidad.
Tungod niini, dunay uban nga makapahimulos lamang sa pagkuha ug litrato isip proweba nga nabuhat sa mga benepisyaryo ang gipangayo kanila sa panggamhanan.
Nagalusad ug monitoring ang CMO sa matag barangay ug ilang siguraduhon nga susihon nila ang tanang agi ug kalihukan sa mga benepisyaryo.
Sa kasamtangan, anaa sa 16,640 ka mga benepisyaryo ang nahilakip sa maong programa gikan sa tulo ka distrito sa dakbayan.
Makadawat sila ug kapin P6,000 human sa 15 ka adlaw nilang pagpanarbaho, upat ka beses matag simana. Nakig-alayon na karon ang CMO, DOLE XI ug mga barangay aron pagatutukan ang mga nilihukan sa mga benepisyaryo.
via || Bombo LJ Florendo
