DAVAO CITY – Nakipag-alayon na ang Davao City Health Office ngadto na sa Overseas Workers Welfare Authority kon OWWA ug Bureau of Quarantine aron matutukan ang posibleng pagsulod ug pagkuyanap sa makakuyaw nga sakit nga monkeypox virus, taliwala sa pagsulod-gawas na sab sa mga biyahero gikan sa ubang kanasuran.
Gikanayon ni City Health Office Head Dr. Ashley Lopez nga ang importante ang hugot nga koordinasyon isip pagpangandam ug pagtubag sa pagsulod sa maong kagaw.
Aduna nay upat ka mga kaso ang natala sa National Capital Region apan wala pa hinuon nataptan sa Visayas ug Mindanao.
Samtang, nag-negatibo sa RT-PCR test ang usa ka pasyente nga nagpaayo karon sa Southern Philippines Medical Center nga daw usa sa gidudahang kaso sa monkeypox virus nga nakabaton ug susamang mga sintomas sa sakit.
Dugay nang gipangandaman sa lokal nga panggamhanan ang ilang mga pasilidad panahon nga mukuyanap na ang makalilisang nga sakit diri sa dakbayan.
Gibutyag sab sa program manager ug head sa Emerging and Re-Emerging Infectious Diseases sa buhatan nga si Dr. Kristy Dayanan nga nagpahigayon na sab sila ug awareness campaign ug capacity building alang sa mga health workers, Barangay Health Workers, ug ubang mga opisyal ug personahe sa trese ka health districts diri sa syudad.
Mipasailawom na sa maong pagbansay ang mga frontliners sama sa mga medical personnel, mga nasa isolation facility, lakip na ang rapid team.
Lauman sab nga iapil sa awareness training ang mga miyembro sa Barangay Disaster Risk Reduction and Management Office kon BDRRMO.
Gihangyo sab sa buhatan ang recalibration sa mga molecular laboratories sa dakbayan aron mahatagan ug pagtagad ang mga kaso sa monkeypox base sa gipagawas nga sumbanan sa Research Institute for Tropical Medicine.
Padayon ang pag-awhag sa buhatan ngadto sa katawhan nga makanunayong sundon ang minimum public health standards aron makalikay sa monkeypox virus.
VIA || Bombo LJ Florendo
