DAVAO CITY- Nagpahinumdom ang department of agriculture ngadto sa katawhan nga likayan ang pagpataka ug post sa social media nga moresulta sa pagpanic sa katawhan sama na lamang sa nahitabo karon nga sumala pa wala nay mapalit nga bugas ang mga negosyante sa mga bodega dinhi sa dakbayan sa Dabaw.
Gikanayon ni Celso Vergara, Regional Public Relations officer sa DA 11, nagpahimangno usab ang ilang buhatan batok sa mga negosyante nga nalambigit sa hoarding o nagtago ug mga sinakong bugas o dili ba kaha nagamanipula sa presyo sa bugas nga mag-atubang kini ug bug-at nga silot subay na usab sa kalapasan sa Republic Act 7581 o Price Act.
Una nang nagpagawas ug official statement ang DA 11 labot sa usaka misleading post nga mikatag sa social media labot sa shortage sa supply sa bugas sa pipila ka mga tindahan sa syudad.
Labot niini, gipasalig sa DA nga adunay bastanting supply sa bugas ang syudad human miabot ang dul-an 3,465 metric tons o 69,300 ka mga sako sa bugas dinhi sa dakbayan sa dabaw.
Gipasalig usab sa DA 11 nga ipadayon ang hugot nga monitoring sa supply sa bugas sa syudad ug sa mga negosyante aron malikayan ang pag-manipula niini.
