DAVAO CITY – Gumikan kay apektado sab ang dakbayan sa Davao sa pagsaka sa presyo sa mga karneng baboy ug manok ug nihit na sab ang supply niini, gikonsidera karon sa Department of Agriculture (DA) nga magpatuman sab ug price ceiling sulod sa 60 ka adlaw.
Kahinumduman nga halos tibuok nasod apektado sa pagsaka sa presyo sa karneng baboy gumikan sa outbreak sa African Swine Fever (ASF).
Una ng gibutyag ni Alexander Sibuan, DA-Davao Agribusiness and Marketing Assistance Division project assistant, nga sa kasamtangan giplanohan pa nila ang pagpatuman ug price cap sa farm gate ug retailing.
Plano sumala pa nila nga imbitahan ang mga nagkadaiyang stakeholders kalakip na ang hog raisers ug meat vendors ug magdesisyon sila kung unsa ang angayan nga presyo sa nahisgutan nga mga produkto.
Gitataw sab sa DA official nga magpahamtang sila ug susama nga price ceiling sa Metro Manila nga epektibo human ang ilang gipahigayon nga pagdungog.
Apan una na sab nga gibutyag ni Hog Farmers Association of Davao Inc. (Hogfadi) president Eduardo So nga ang pagpatuman ug price cap ang dili sumala pa solusyon na nahisgutan nga problema.
Gikanayong ang produksiyon sa manok mamahimong makatabang sa hog industry samtang nagpabilin ang taas nga presyo sa karneng baboy.
Nasayran sa DA-Davao nga anaa sa 41,831 hogs gikan sa 8,885 ka mga apektado hog raisers sa tibuok rehiyon ang gipamatay gumikan sa maong disease sukad Enero 2020 hangtud sa kasamtangan. Gikanayong ang culling ang nakitang solusyon aron nga mapugngan ang pagkatag sa hog virus.
